Црна сообраќајна точка станува клучката кај Три Чешми, каде што се спојува експресниот пат кон Штип со автопатот Штип-Миладиновци. Рано утринава на лице место загина 37-годишен возач од Гевгелија, кој со својот автомобил марка голф директно се судрил со тешко товарно возило, управувано од 26-годишен маж од скопското село Блаце.
„На местото на несреќата починал возачот на автомобилот, а смрт констатирал лекар. Додека возачот на товарното возило се здобил со телесни повреди констатирани во Клиничката болница во Штип. Увид на местотот на настанот изврши екипа на СВР Штип и јавен обвинител“, изјави Гордана Панајотова, портпарол на СВР Штип.
Според неофицијални информации кои протекоа на терен, починатиот возач половина час пред несреќата кај Велес бил запрен од страна на сообраќајна контрола и казнет за брзо возење. Но, од СВР Велес не ја потврдуваат информацијата, со образложение дека станува збор за лични податоци. Додека се одвиваше увидот, автопатот Штип-Миладиновци беше затворен за сообраќај во двете насоки, сообраќајот се одвиваше по регионалниот пат. Ова е трета жртва на патиштата околу Штип од почетокот на годината.
Викторија Димитрова Јованова