Околу 100 припадници на Украинската армија пристигнаа доцна синоќа во американската база Форт Стил во Оклахома, каде што ќе се обучуваат за оперирање на противракетниот систем „Патриот“. Киев со месеци го бараше противракетниот систем од Вашингтон, а одлуката беше соопштена за време на посетата на Зеленски на САД во декември, кој тогаш истакна дека само една батерија би направила голема разлика во зајакнувањето на украинската одбрана од руската инвазија.
- „Значи, војници од украинските одбранбени сили пристигнаа во тренинг центарот во Форт Стил, Оклахома за да ја започнат обуката за противвоздушна одбрана. Обуката се состои од задачи за оперирање и одржување на противвоздушниот систем „Патриот,“ – полковник Куртис Кинг – Артилериско училиште на Американската армија.
Бројот на војници кој пристигна во Оклахома одговара токму на бројот на персонал потребен за да се оперира со една батерија на системот „Патриот“, кој се состои од повеќе возила, моторизиран систем за лансирање, радар, контролна станица и генератор.
Доцна синоќа пак, во нуклеарната централа во Пивденоукраинск во јужна Украина пристигна првиот специјализиран експертски тим на Меѓународната агенција за атомска енергија.
- „Сега оставаме група експерти кои ќе останат овде. Истото ќе го направиме во сите други места. Тесно ќе соработуваат со нашите украински домаќини за да се олесни обезбедувањето техничка поддршка, испорака на опрема, за да се осигуриме дека сите овие објекти, кои се толку важни за земјата, особено во ова тешко време, ќе продолжат да работат нормално и без проблеми“ – Рафаел Гроси – Генерален директор на МААЕ.
Минатата недела агенцијата соопшти дека по барање на Украина ќе испрати експертски тимови и во нуклеарните централи во Ривне, Хмелнитски и Чернобил. Во договор со Украина, Агенцијата одлучила во земјата да воспостави постојано присуство од 12 експерти кои покрај тоа што ќе ја надгледуваат состојбата во нуклеарките, ќе направат и проценка на опремата и потребите на секоја од нив, како и да понудат експертски совети.
Игор Трајков