Оваа скопска панорама станува секојдневие. Густа магла го прекрива Скопје, додека мерните станици веќе алармантно го издигнуваат главниот град меѓу оние најзагадените. Причините се добро познати, а предизвиците се сè побројни. Енергетската криза е тука, а црвениот аларм е вклучен – скопската панорама ќе стане уште полоша за гледање ако во печките се гори мазут. Ова го знаат и надлежните и апелираат – користете гас. Гас, пак, може и да нема. Но, сигурно е дека ќе има казни ако има греење на мазут. Министерот за животна средина, Нуредини, побара и поголема соработка на активистите со општините, за да се решаваат проблемите.
Во Македонија има вкупно 21 мерна станици – половина во Скопје, а другите распространети низ другите градови. Но, тоа не е доволно сметаат дел од еко-активистите.
Отровите во воздухот се директна причина за многу болести и здравствени состојби. Прецизни податоци нема, но здравствените статистики пресметуваат најголема стапка на смртност, токму во зимскиот период кога и концентрациите на отровните ПМ2,5 и ПМ10 честички во воздухот се преку сите граници. Просечно, околу 1300 животи годишно се на сметка на аерозагадувањето.
Тамара Марковска