„Алтернатива„ не ги дава министерските позиции за кои се пазарат ДУИ и СДСМ со Алијанса за Албанците. Нив, велат, треба да ги отстапат тие на кои им гори под нозете од „Огнената група„ кои се закануваат дека ќе формираат посебна пратеничка група. Не гледаат причина за нов коалиционен партнер во владејачкото мнозинство, кое според нив и вака добро функционира.
Од петокот се шпекулираше дека од „Алтернатива„ се бара да ги отстапат ресорите Здравство и Министер без ресор, од причина што дел од сопартијците се незадоволни од министерот Сали. Извори и од „Алијанса за Албанците„ потврдуваат дека разговорите не одат така лесно, дека никој не сака да попушти, а сите сакаат да добијат. ДУИ, наводно, се подготвуваат да се откажат од министерствата за животна средина и за образование. Едното да ѝ го отстапат на „Алијанса„, а другото да го заменат за ресорот правда. СДСМ, пак, не сакаат да се откажат од бројот на министерски места, но се расположени за рокада иако премиерот упорно тврди дека се` уште не се разговара за ресори.
Според наши извори, премиерот петочната средба со в.д претседателот на Алијанса, Арбен Таравари ја завршил со зборовите: „Се` ќе зависи од партнерите„., што се чини дека добива потврда со последните случувања.
Далиборка Демјанска Цветановска