РЕК Битола двојно го зголеми капацитетот за производство на струја откако синоќа во 22:51 часот Блок 1 е синхронизиран со електроенергетскиот систем на земјава.
Постројката е повторно во функција после 23 дена ремонт и заедно со Блок 2 испорачуваат електрична енергија.
Согласно Планот за производство и во непроменети околности, РЕК Битола треба да продолжи да работи со два блока до почетокот на ноември. Откако ќе биде монтиран новиот трансформатор на Блокот 3, во краткотраен ремонт треба да влезе и Блок 2 со цел да се зголеми доверливоста и стабилноста на капацитетот во екот на грејната сезона, велат од ЕСМ.
Од таму додаваат дека во моментов се задоволуваат потребите за струја на домаќинствата и малите потрошувачи исклучиво од сопствено домашно производство.