За десетина дена ќе се избира ново претседателство на Демократската унија за интеграција, најави лидерот Али Ахмети, по речиси 6 часовни разговори со членовите на т.н. огнена група, која побара реформи во партијата. На Централното собрание покрај тоа отчет за сработеното ќе дадат и министрите, по што партиските органи ќе одлучат како ќе постапат по барањата за нивна смена, но и барањето за смена на првиот вицепремиер Артан Груби.
Ахмети во изјавата за медиумите, придружуван од Муса Џафери, Изет Меџити, Блерим Беџети, Невзат Бејта и Садула Дураку, рече дека нема оган и дека во ДУИ секогаш се почитувало различното мислење.
Денеска имавме разговор со долгодишните соработници со кои сум минал во многу важни процеси, во многу успеси. Разговаравме. Дебатата во суштина се враќа внатре во партијата. На 15 октомври ќе има централно собрание на кое ќе се разговара за политичката ситуација, ќе се избере новото Претседателство и ќе има отчет на владиниот состав на ДУИ. Нема оган, нема пламен. Никогаш немало напори за истиснување, за војување или за гаснење на различното размислување и тоа е карактеристика на ДУИ. До вистинските одлуки секогаш сме доаѓале со меѓусебно почитување. Значи оган нема и нема да има, изјави Ахмети.
Ова е втора средба од ваков вид. Пред неколку дена Ахмети се сретна и со членови на ограноците на Сарај и Чаир.
Повод за ваквите средби е писмото кое „огнената група“ го достави до раководството на партијата во кое побарале да се формираат партиските тела и одлуките да се носат во партиските органи. Тие побараа и смена на владини министри и на Артан Груби.
Иако во јавноста излезе информација за иницијатива за интерпелација на Груби, БЕСА за сега не планира да поднесува интерпелација, но во иднина не ја исклучува таквата можност. Инаку нивниот поранешен член, пратеникот Кастриот Реџепи, се приклучи кон т.н. огнена група.
Данијела Билбиловска