Стотина академици, соработници на МАНУ, декани, универзитетски професори и историчари во заедничка изјава која ја потпишаа со индигнација ги отфрлаат и ги сметаат за ништовни, псевдонаучни и нерелевантни за понатамошната научно – истражувачка работа препораките на Заедничката мултидисциплинарна комисија за историски и образовни прашања за заедничко одбележување на Македонија и Бугарија на историски личности. Меѓу другото сметаат дека „Препораките…“ го игнорираат фактот дека „историското право“ не е призната категорија во меѓународното право, па следствено -за историските прашања не се валидни политичките спорови и договори.
Ја интерпретираат, па и ја ревидираат македонската и регионалната балканска историја на начин кој има политички претекст, поради што отстапуваат од принципот на научност и етичност.
Политичкото инсистирање да се усвојат билатерални препораки за историја која има мултилатерален и унилатерален карактер, па не може да се официјализира како „заедничка“ бугарско-македонска историја и претставува повреда на референтната парадигма на хуманистичките науки. „Препораките“ промовираат метод на арбитрарно и пристрасно толкување на историските факти, личности, настани и процеси кои се значајни за повеќе народи, култури, држави и епохи.
Македонската историја претставува суверен интерес на Република Македонија, како што историјата на Бугарија е примарен интерес на бугарската држава, па треба да го задржи правото на сопствено научно и официјално толкување.