Градоначалничката на Скопје, Данела Арсовска и директорот на ЈП Улици и патишта, Борис Настов, извршиле денеска увид во почетокот на реконструкцијата на пешачките патеки во дел од градскиот парк.
Преку социјалните мрежи тие се пофалија дека со реконструкцијата се опфатени над 12 000 квадратни метри а ќе се продолжи и со реконструирање на сите пешачки површини во паркот.
Според Арсовска, од вкупната површина 7 500 квадратни метри се пешачки патеки кои се покриени со ризла и ќе бидат асфалтирани а 5000 квадратни метри пешачки патеки кои биле со големи оштетување ќе бидат санирани со нова асфалтна маса.
Токму ова асфалтирање на пешачките патеки предизвика низа бурни реакции кај граѓаните на социјалните мрежи.
Се укажува дека овие патеки досега не биле асфалтирани од ниту еден скопски градоначалник, затоа што станува збор за природна околина, асфалтот бргу се загрева и создава поголема топлина и е материјал кој се избегнува за поплочување на паркови.
Од Кабинетот на градоначалничката се правдаат дека ги асфалтираат земјените патеки на барање на граѓаните кои наводно се жалеле дека немаат услови за движење на колички , точаци и многу прашина се кревало.
Преку Фејсбук реагираше и поранешниот градоначалник на Скопје, Петре Шилегов, кој оцени дека во таканаречениот турски дел од паркот ( кој е подигнат на почетокот на 20-тиот век) постоеле земјени пешачки патеки, останати како традиција и стоеле така повеќе од 100 години.
„Изборот на асфалт како подлога за стази во парк, во денешно време, е ствар на тотално незнаење и дефинитивно на лош, ама многу лош вкус!“ – напиша на Фејсбук, Шилегов.
