Автономијата на УКИМ без достоинствени плати е илузија, а државата не заборави, потценувајќи го интелектуалниот труд. Ова го кажаа од Сојузот на синдикати на УКИМ,на протестот пред Ректоратот. Не го прифаќаат најавеното , како што рекоа, минимално зголемување на платите од септември и Општиот колективен договор. Побараа потпишување нов грански Колективен договор со Собранието како основач на Универзитетот, со кој е предвидено зголемување на платите за 25% секоја година во следните 4 и потврда за тоа од Министерството за финансии , што ја чекаат веќе 3 месеци.
- Бараме најитно да се потпише нашиот Колективен договор за кој што преговараме повеќе од една година, за да се врати достоинството на научните работници и вработените на УКИМ. Бараме значително да се подобри нашата материјална положба, со вистинско и систематско покачување , четиригодишно покачување на платите, за да дојдеме до достојно ниво на плати во регионот, рече претседателот на Сојузот на синдикати на УКИМ, Ангел Ристов.
Поддршка на протестот даде Ректорската управа, Сенатот и ректорот Јанкуловски.
- Минатите години дојде до повеќекратно покачување на платите на вработените на сите степени на образование. Предучилишна возраст, основно и средно образование. Вработените на Универзитетот некако се чувствуваат занемарени. И навистина, со оглед на фактот дека плата на еден редовен професор на УКИМ е 39 000 денари, рече ректорот на УКИМ, Никола Јанкуловски.
Покрај наставниот и од ненаставниот кадар на УКИМ се пожалија на платите и рекоа дека работат за двајца или тројца зашто Владата не дозволува нови вработувања.
- Финансирањето на ненаставниот кадар изнесува од 18 до 25 000 ден. Кажете ми , како може ненаставен кадар со високо образование, вработен во високообразовна институција да има волкав износ на месечен приход? И кој со тоа во оваа држава може да опстане, праша Габриела Анастасовска, раководител на оддел за финансии при ФЛУ.
Потребно е и вложување во научно- истражувачките проекти без кои нема развој на економијата во земјава, кажа професорот Зоран Киткањ.
Барањата на Синдикатот на УКИМ се испратени до Владата, Собранието и до Министерството за образование. Доколку Владата не ги исполни во најскоро време, ќе следува нов , поголем протест пред нејзината зграда, порачаа од синдикатот.
Сотир Трајков