Македонските граѓани купуваат над 9 илјади кутии дијазепам дневно. Во првите денови од месецот побарувачката е поголема и се движи и до 15 илјади, а вчера достигна 15 илјади и 700. Последната анализа на Фондот од 2020 та година покажува дека, биле издадени 1 милион и 300 илјади рецепти, односно 450 илјади повеќе од 2014-та. Овој лек е на високото трето место на најкористени лекови во Македонија, веднаш зад еналаприл за висок притисок и метформин за дијабетес. Иако најчесто се издава како придружна терапија за високиот притисок и срцевите заболувања, дијазепамот е високо и на листата на лекови кои предизвикуваат физичка и психичка зависност. Неговата прекумерна употреба, според доктор Игњатова од Медицинскиот факултет, не е ништо ново и е резултат на повеќегодишната здравствена политика.
Доктор Игњатова објаснува дека, науката вели, ако на ранлив човек му се препише лек кој предизвикува зависност, има висок ризик тој и да ја развие, затоа што мозокот меморира, помни што е тоа што му направило добро, што го релаксирало, опуштило, и потоа лицето е мотивирано да ги повторува истите дејствија. Антидепресивите се многу побезбедна варијанта, но повторно поради здравствената политика, нив матичните лекари не смеат да ги препишуваат без препорака од психијатар, а нашиот народ има аверзија од психијатри.
Доктор Игњатова вели дека, со тоа што, дијазепамот со години наназад се препишува, е создадена голема група на луѓе зависни од овој лек, кои ги користат и по десет-дваесет години. Сега е многу тешко, па дури и опасно да се одвикнат, апстиненцијалните кризи се големи, зависноста се повторува и тоа е сериозен предизвик за здравствениот систем.
Препорачува да се размислува, прво, што да се прави со штетата што е веќе направена, како да им се олесни животот на тие кои се веќе зависни од дијазепам, и второ, како да се превенира создавање на нови зависници. Потребна е построга проценка на тоа, кому може да се препише дијазепам, но и промена на здравствената политика, односно да се дозволи да се препишуваат антидепресиви, кои се многу полесни, без препорака на психијатар.
Далиборка Демјанска Цветановска