На собраниските службеници местото им е на работа среде работното време, а не на кафе на улица Македонија.
Вака коментира собранискиот спикер Талат Џафери, откако беше снимен како со погрдни зборови им се обраќа на вработените во Службата.
Снимката која излезе во јавност е од пред речиси две недели. Реакции имаше многу, а Џафери вели – нема објаснување и додава дека не чувствува потреба да се извини.
„Ако некој мисли дека ќе ја пуштам службата да не работи, се лаже. Имаат осум часа работно време и толку треба да се на работното место”, кажа Џафери на брифингот.
Пцовките не беа кон вработените туку кон нивниот однос кон работата што ја имаат, а не како што сугерира опозицијата, тврди Џафери.
Додава дека пратеничката група на ВМРО-ДПМНЕ којашто ја блокира работата на Собранието, треба да води сметка за тоа што самите тие го направиле, а не да оценуваат дали претседателот го прекршил етичкиот кодекс.
Опозициските пратеници и денес како и досега, бараа одговорност од Џафери за навредливите зборови.
Во меѓувреме, пратеници од владејачкото мнозинство не го осудуваат спикерот за поведението.
Образложението е – да се почека и да се види, дали тој има вина за однесувањето.
„Прашање: Како ќе се однесувате ако сега јас вас ве опцујам?
Одговор: Па, ќе побарам да ми се извините.
Прашање: Сметате ли дека господинот Џафери треба да им се извини на службениците?
Одговор: Па, сигурна сум дека тој тоа веќе и го направил. Да утврдиме најпрво што е причината за таквото однесување. Еве, јас ќе ви кажам дека претседателот на ова Собрание, господинот Талат Џафери реално и искрено, од страна на службите е еден од најпосакуваните претседатели досега, бидејќи многу се залага за нив“ е дел од изјавата на Даниела Маркоска, пратеничка од редовите на СДСМ.
Ова не е лов на вештерки, туку вработените направиле грешка со тоа што доставиле погрешни материјали за седницата, кажа спикерот на брифингот со новинарите.
Неизвесно е дали ќе се поведе дисциплинска постапка против службениците, но за случајот е покрената соодветна процедура во Комисијата за деловнички и мандатно-имунитетни прашања и материјалот е процесуиран.
Џафери засега одбива да коментира дали има основ за негова суспензија.
Потенцира дека со Деловник за работа се пропишани надлежностите, а собраниската служба треба да создава услови за непречено одвивање на седниците, затоа што Собранието има создадено услови за нивно работење.
Лани се набавени 100 компјутери за конкретната служба.
Петар Догов