Заразените со индискиот сој на корона не го пренеле вирусот на други лица во земјава, и покрај тоа што вториот случај подоцна пројавил симптоми и бил во контакт со семејството, покажала епидемиолошката анкета. Првиот заболен беше откриен на почетокот на јуни, а претходно престојувал во Ирак, додека вториот случај е негов колега, кој се враќал со истиот лет. Министерот смирува и не планира дополнителни рестрикции или дополнителни тестови по примерот на соседните земји, ниту за лицата кои влегуваат во државата, и покрај зголемената фреквенција на туристи и иселеници, како и патувањата на навивачите.
Филипче е воздржан во однос на очекувањата од заразата со индискиот сој, но тврди дека ризикот е мал, особено за вакцинираните лица.
Околу 240 илјади граѓани во Македонија се вакцинирани со една доза, околу 200 илјади се ревакцинирани, а 180.000 пријавени се` уште чекаат вакцина.
Она што се знае за овој сој на вирусот е дека се шири со поголема брзина. Кај помладите дава полесна клиничка слика од типот на главоболка и кивавица и не се губи сетилото за мирис и вкус, што не беше типично кај претходните соеви.
Министерот не е загрижен ниту поради журките од кои секојдневно се објавуваат фотографии и видеа на социјалните мрежи. Тврди дека, локалите не се место каде може да се шири заразата, затоа што се полни 50 отсто од просторот, а состојбата засега е мирна.
Само во две земји во Европа не се олабавени мерките. Се работи за Велика Британија и Португалија кај кои се рашири овој сој на вирусот, додека сите останати, вклучувајќи ги и земјите од регионот, попуштаат со рестриктивните мерки. За ова е дискутирано и минатата недела, на состанокот со министрите за здравство од сите земји на Западен Балкан, во рамките на Берлинскиот процес и е констатирано дека епидемиолошката ситуација стивнува.
Далиборка Демјанска