Иако имаат шест мандати разлика, двете групации во албанскиот политички кампус, коалициите „Вреди“ и „Европски фронт“, прогласија победа на вчерашните парламентарни избори. И едните и другите со свои аргументи ја образложија победата и најавија дека следниот чекор е влез во идната Влада. Лидерите на коалицијата „Вреди“ се децидни дека го имаат мнозинството на гласовите Албанци, ДУИ цврсто на ставот ние имаме најмногу освоени мандати по ВМРО-ДПМНЕ.
Од седиштето во Мала Речица, претседателот на ДУИ, Али Ахмети порача дека по вчерашните избори со освоени 19 мандати коалицијата „Европски фронт“ е втора политичка сила во државата и нагласи дека ВМРО-ДПМНЕ треба да ги почитува освоените гласови, бидејќи на Македонија и треба стабилност, мир, нула проблеми со соседите, владеење на правото и почеток на преговорите за членството во ЕУ.
Лидерите на партиите здружени во Коалицијата „Вреди“ ја прославија победата неколку часа пред ДУИ, прво во штабот во Скопје а потоа и на плоштадот во Тетово. Со над 100.000 гласови на своето конто и освоени 13 мандати од „Вреди“ се прогласија за легитимен победник во албанскиот блок и легитимни претставници на Албанците, бидејќи нивните гласови биле чисто албански.
Одлуката за евентуално коалицирање останува кај ВМРО-ДПМНЕ како апсолутен победник на парламентарни избори, но ако се суди по сликата од средбата која се одржа во понеделникот во штабот на плоштадот Скендербег, коалицијата „Вреди“ е во предност.
Огнен Чанчаревиќ