Четврти ден како трае штрајкот на приватните специјализанти. Решени се дека нема да се откажат се додека надлежните не им ги исполнат барањата. Во оваа борба чекорат сами. Поддршка побарале од нивните постари колеги, но наместо разбирање наишле на осуди и притисоци од Клиниките за стопирање на штрајкот. Младите специјализанти ги осудуваат нивните колеги и им порачаа дека нема да подлегнат на нивните притисоци.
„Најчестиот коментар од постарите колеги е дека тие работеле приватна специјализација за 0 денари. Меѓутоа сметам дека ние треба да напредуваме, а не да бидеме на едно исто ниво триесет години. Сакаме јавно да ги осудиме притисоците коишто ги имаат колегите од клиниките и од постарите колеги специјалисти. Сакам да ги охрабрам сите колеги кои се приватни специјализанти да не подлегнат под притисоците од клиниките и да издржат во оваа наша борба“, вели д-р Христина Илиоска Чешлароска, приватен специјализант по интерна медицина.
Тие во понеделник го продолжуваат штрајкот пред Министерството, под мотото 5 до 12 за македонското здравство.
„Ние сакаме веднаш да се остварат нашите барања, а тоа е покачување на надоместокот и бесплатно здравствено осигурување, но со оглед на тоа дека тие барања не се решени нашиот штрајк продолжува. Сакаме да укажеме една јасна порака до Министерството за здравство и целата држава дека навистина се наоѓаме во 5 до 12 за нашето здравство затоа што доколку овие 400 приватни специјализанти не ги добијат своите барања јас сум сигурна дека половина од нив имаат спакувано куфери и чекаат да заминат“, додава Илиоска.
Приватните специјализанти бараат да бидат вработени, со здравствено осигурување и просечна плата. Од Владата им одговорија дека нивните барања ќе бидат решавани по изборите.
Тамара Марковска