Најмалку 73 луѓе загинаа, а повеќе од 50 се повредени во стравичниот пожар што утрово избувна во повеќекатница во центарот на Јоханесбург. Меѓу жртвите има и седум деца од кои најмладото имало една година. Некои од луѓето кои живееле во зградата се обиделе да се спасат од огнот со скокање од прозорци што за дел од нив било фатално.
Според јужноафриканските медиуми, зградата се користела како неформално засолниште на мигранти од други африкански земји. Очевидци, пак, велат дека во објектот престојувале околу 200 лица. Спасувачките операции во зградата, која изгоре во целост, продолжуваат, па локалните власти стравуваат дека бројот на загинати би можел да расте.
Според портпаролот на Итната служба на Јоханесбург, меѓу загинатите е и едно дете. Најголем дел од повредените се згрижени во болнички услови, а на дел им е укажана прва помош на лице место, особено на оние кои се пожалиле на вдишување на поголема количина на чад. Мигрантите, како што нагласи Мулауџи, се вселиле во зградата без никакви официјални договори за закуп што ја отежнува работата на спасувачките екипи.
Градските власти на Јоханесбург формираа група за изнаоѓање на начини за пренамена на старите згради во централното градско подрачје. Дел од зградите се во раце на картели кои собираат наем од луѓето кои незаконски се сместени. Според официјални лица, тоа покажува дека мигрантите се принудени на таков начин на сместување, бидејќи не можат да си дозволат да плаќаат регуларна кирија во достоинствени услови за живот и ја повикаа владата да изнајде начин за решавање на проблемот со нелегалното сместување на бездомници.
Сашко Димовски