Франција го дочека првиот од неколкуте планирани авиони за евакуација на свои, но и странски државјани од Нигер. Одлуката на француските власти за организација на извлекување на луѓе од западноафриканската држава доаѓа по, речиси, една недела од воениот пуч, соборувањето на демократски избраниот претседател на земјата и затворањето на нејзините граници. Покрај Франција, евакуација на свои државјани од Нигер најавија Италија, Шпанија и Германија.
Француското Министерство за надворешни работи како една од причините за евакуацијата го наведе неодамнешното насилство кон француската амбасада во Ниамеј.
Западноафриканското регионално тело познато како ЕКОВАС во неделата објави патнички и економски санкции против Нигер и не исклучи можност за употреба на сила доколку водачите на воениот удар не го вратат претседателот Базум на власт во рок од една недела. Хунтата во Нигер во меѓувреме доби поддршка од воените влади на Мали, Буркина Фасо и на Гвинеја.