Меѓусебни обвинувања од типот „не сме ние, вие сте“ разменуваат Киев и Москва по оштетувањето на браната Каховка, утрово на југот на Украина. Водата која неконтролирано истекува од акумулацијата Каховка поплави многу населени места во и околу Херсон, а во критичната зона и под опасност од поплави се наоѓаат 24.000 луѓе. Локалните власти го евакуираат населението, а во реонот на Нова Каховка е проглесена вонредна состојба. Инцидентот го осуди Европската Унија за чии претставници нема дилема дека станува збор за нов пример на „варварска агресија“ на Русија.
„Ова е нов знак на ескалација, ужасен акт кој ја потврдува варварската природа на руската агресија на Русија врз Украина, без преседан“, изјави Петер Стано, портпаролот на Европската комисија на прес-конференција во Брисел.
За британскиот министер за надворешни работи, Џејмс Клеверли, намерните напади на цивилна инфраструктура се „воено злосторство“. Украинскиот премиер Демир Шмихал, пак, објави дека 80 населени места се под опасност од поплави. Официјален Киев го впери прстот кон Москва за утринското оштетување на браната на реката Дњепар која ги раздвојуваше руските и украинските сили во Херсон.
Портпаролот на Кремљ, Дмитриј Песков, пак, за уништувањето на браната ја обвини Украина. Според него, таквиот чин бил насочен и кон намалување со водоснабдување на полуостровот Крим, но и за дефокусирање на јавноста од, како што нагласи, големата офанзивна акција на украинската војска пред два дена која не ги постигнала целите.
Браната Каховка е изградена во 1956 година и се наоѓа најјужно од шесте хидроелектрани што се изградени долж реката Дњепар за време на советскиот период. Од Каховка, низдолжно постои канал кои води до Црното Море. Браната е висока околу 30 метри и широка околу 3.200 метри и содржи отприлика идентично ниво на вода како и Големото солено езеро во американската сојузна држава Јута.
Сашко Димовски