Државната комисија за спречување на корупција (ДКСК) ја демантира изјавата на министерот за надворешни работи, Бујар Османи во која тој посочува дека во МНР нема Извештај којшто покажува дека била направена злоупотреба на возила за партиски цели. Извештајот констатира дека во предизборниот период Министерството имало 15 свои возила и две позајмени од Агенцијата за разузнавање и оти нема евиденција, ниту може да се докаже колку гориво е потрошено.
ДКСК своите наводи ги темели на издадениот Конечен извештај од извршната ревизија на регуларност на искажаните трошоци за службените возила во МНР од 1 август до 31 октомври 2021 година (во изборен процес). Во извршното резиме до министерот, наведени се состојби кои укажуваат дека нема определено надлежно лице за водење евиденција на возила, опрема и нивно сервисирање. Нема евиденција за лице кое управува со службено возило, ниту се прават патни налози за поминати километри. Одредени корисници на служени возила немаат обезбедено и доставено уредни и веродостојни сметководствени документи до секторот за финансиски прашања, се наведува во соопштението на ДКСК.
Исто така, додаваат дека не е воспоставен систем за контрола на користење и потрошувачка на гориво на службените возила и ова е спротивно на тврдењата на Османи дека „нема таков извештај од некој внатрешен ревизор“ и оти ДКСК погрешно ги интерпретира наводите.
– Имајќи ги предвид наводите од Извештајот, ДКСК ја донесе предметната Одлука број 12-436/1 23.01.2023, се вели во соопштението.