Израел утрово почна нови артилериски напади врз Рафа, откако преговарачките тимови ги напуштија мировните преговори во Каиро без да постигнат договор.
Палестинското движење Хамас претходно соопшти дека Израел го отфрлил предлогот на посредниците за прекин на огнот во Газа.
„Политико“, повикувајќи се на дипломатски извори, објави дека преговорите меѓу Израел и Хамас се суспендирани, меѓудругото и поради воените операции во Рафа.
Хамас во понеделникот соопшти дека се сложил со условите за примирје во три фази од 42 дена што го предложија египетските и катарските посредници. Тоа требаше да опфати ослободување на израелските заложници и прекин на непријателствата во Појасот Газа.
Израелските одбранбени сили во вторникот влегоа во Рафа во рамки на наводна антитерористичка операција и презедоа оперативна контрола врз граничниот пункт Керем Шалом. Операцијата се водеше среде тековните напори на посредниците да ги доведат двете страни во војната во Газа до договор за прекин на огнот во замена за ослободување на израелските заложници. Пречка засега е барањето на Хамас за Израел да даде гаранции целосен прекин на војната во Појасот и повлекување на воените единици од терен.
Израелското раководството е подготвено за привремен прекин на огнот во замена за ослободување на заложниците, но не отстапува од намерата за остварување на сите зацртани цели во војната, меѓу кои се целосна елиминација на борбениот и политички капацитет на палестинското движење.