Без точен возен ред, преполни автобуси со патници, гужви на постојките по скопските улици. Град Скопје и ЈСП од една страна и здруженијата на приватните превозници продолжија и денеска со меѓусебни обвинувања, префрлајќи си ја вината за колапсот на јавниот сообраќај. А скопјани и понатаму се снаоѓаат како знаат и умеат за некако да стигнат навреме до работните места училишатата и домовите поради редуцираниот број на автобуси. Револтирани бараат да се реши овој проблем што побрзо.
Од Град Скопје без солуција или конкретен предлог. Единствено е дека во понеделник советниците ќе имаат можност да постават прашање до надлежните околу овој проблем кој почнува да го парализира нормалното функционирање на граѓаните.
Хаосот во приватниот превоз продолжи и утринава. Приватните превозници ги паркираа своите автобуси пред ЈСП и побараа средба со директорот Александар Стојковски. Барањето експресно беше одбиено.
Приватните превозници од „Макекспрес“ и „Слобода превоз“ кои возат на 15 градски и приградски линии веќе една недела се во отворен судир соградски власти поради долг од околу еден и пол милион евра. Станува збор за средства кои ЈСП треба да им ги исплати на приватниците за плати и режиски трошоци.
Симона Петровска