Интензивните врнежи од дожд во Маврово, предизвикаа лизгање на теренот и оштетување на каналот кој ја носи водата до хидроелектраната Врбен. Таа е составен дела од Мавровскиот хидросистем на Дражавните електрани и годишно просечно произведува 38 гигаватчаса електрична енергија. Од ЕСМ уверуваат дека со оштетувањето на каналот не е загрозено производството на струја.
На доводот Горна Радика ,поточно Речки канал, како последица на интензивните врнежи во последните неколку дена, се случи појава на лизгање на теренот и оштетување на дел од каналот, при што дел од водата се излева надвор од доводот. Наши стручни лица се на терен и се преземаат сите мерки околу санирање на оштетениот дел од каналот, кој во преостанатиот дел е во функција и непречено ги носи водите до хидроелектраната Врбен. Производството на електрична енергија не е загрозено и конзумот се обезбедува преку капацитетите на АД ЕСМ, се наведува во соопштението од АД ЕСМ
Експертите со кои разговараше Телма велат дека најверојатно ваквото свлечиште е предизвикано од оголените терени во Маврово и исечената вегетација поради градежната експанзија и урбаниот хаос. Ова лизгање на земјиштето во каналот од хидроелектраната Врбен е предизвикано од 11 литри дожд на метар квадратен кои наврнаа во изминатите 24 часа во Маврово. Но, неизвесно е што ќе се случи од поголеми количини дожд, како и врнежи од снег зимава.
Од Државните електрани, пак, нема одговор на прашањата на Телма, во каква кондиција се производствените капацитети на компанијата, и дали со сите слабости на системот, стари и дотраеани електрани, но и недостиг на енергенси, оваа грејна сезона АД ЕСМ ќе може да ги произведе оптималните количини на електрична енергија.
Емилија Мисириевска