Министерството за внатрешни работи (МВР) поднесе кривична пријава против 37-годишниот скопјанец кој е осомничен за предизвикување на пожар на т.н. „просторија за компензација на топловод“ под мостот „Беласица“. Инцидентот се случи на 11 мај лани, а поради направените оштетувања, дел од мостот донеодамна беше затворен за сообраќај, односно се возеше по една коловозна лента.
„По преземени мерки, подигнати докази, извршени вештачења и разговори со повеќе лица, било утврдено дека на 11.05.2023 под мостот „Беласица“, пријавениот предизвикал пожар на т.н. „просторија за компензација на топловод”, кој се проширил на термичката изолација и топловодните цевководи кои се дел од топлификациска мрежа на ЕСМ-Снабдување со топлина, при што се предизвикани топлински оштетувања на наведениот топловод, како и видливи оштетувања на конструктивните елементи на мостот“, се наведува во соопштението на МВР.
Осомничениот И.Х. (37) од Скопје се товари за стореното дело „тешки дела против општата сигурност“ по член 292, а во врска со кривичното дело „предизвикување на општа опасност“ по член 288 од Кривичниот законик,
Како што додаваат од МВР, пријавениот И.Х. од 12 септември лани се наоѓа во КПУ Затвор Скопје на издржување на затворска казна за тешка кражба.