Ескобар си замина за Вашингтон испраќајќи ја пораката за брз почеток на евро-интеграции, власта и опозицијата ги продолжија своите активности, некој на скопскиот Плоштад, некој во Гевгелија, и двете страни со различни видувања. Вицепремиерот Артан Груби вели дека со американскиот дипломат разговарале за европскиот пат и стратешкото партнерство, но не за предвремени избори.
-Не, не се разговараше во однос на предвремени избори, се разговараше единствено за успешно завршување на уставните измени и продолжување на европскиот пат на нашата земја. Се надевам дека ВМРО-ДПМНЕ која има своја програмска определба да ја зачлени нашата земја конечно ќе смогне сили, ќе се надмине себеси, ќе гласа и ќе го тргне ова прашање од дневната политичка агенда затоа што тоа е во интерес на сите граѓани, одговори Груби на прашањето на Телма.
Мицкоски пак повторува владата ја води Македонија по европскиот пат со бугарски диктат, а на Ескобар му разјасниле кој е ставот на партијата. Тврди дека се што го кажуваат јавно како решение го кажале и на американскиот дипломат.
-Се она што го кажуваме во јавност го пренесовме и не е точно она што го тврдат од коалициската влада на СДСМ и ДУИ или обратно, дека во јавност зборуваме едно, а на меѓународните претставници друго. Сите наши ставови му се пренесени. Ценам дека лично на господинот Ескобар позициите на ВМРО-ДПМНЕ му се појасни. Ние сме исто така како и тие загрижени за актуелната состојба на Македонија иако нашата загриженост е поголема затоа што сепак ние живееме во оваа држава, истакна Мицкоски при посетата на Гевгелија.
Но, дали се е разјаснето. Ескобар во интервјуто за 360 степени беше прашан дека преку соопштение по средбата ВМРО-ДПМНЕ наведува дека се за ЕУ-интеграција, но во исто време велат и дека се против уставните измени што, пак, е предуслов за ЕУ-интеграцијата. Очекува разјаснување на дилемата пред можноста која ја има државата.
-Би сакал да ги видам да ја објаснат оваа дилема на јавноста. Затоа што, многу искрено, во моментов, земајќи ги предвид сите работи што се случуваат во Европа и што се случуваат во светот, не знаеме што ќе се случи утре. Но, знаеме дека денеска имаме можности ја придвижиме кандидатурата на Северна Македонија поблиску и побргу од кој било друг на Западниот Балкан. Од гледна точка на пријател, близок пријател, би сакале Северна Македонија да ја совлада оваа пречка и да почне да се дефинира себеси преку односите со трансатлантската заедница, преку нејзините односи со остатокот на светот врз основа на нејзините вредности, а не да се дефинира според Бугарија, рече Ескобар во интервјуто за 360 степени.
Ние не определуваме кога ќе има избори, тоа го прават граѓаните кои треба да ја препознаат актуелната можност и да испратат сигнал до лидерите, порача Ескобар во интервјуто и ни испрати порака дека ни фали сериозна борба против корупцијата.
Мицкоски пак повтори дека владата мора да си замине токму поради корупцијата во сопствените редови и тоа што порано, а не да се чекаат редовни избори кои тој ги очекува напролет. Груби смета дека ќе се создае консензус во Собранието и ја повтори понудата до опозицијата за влада без ДУИ и датум за избори ама откако ВМРО-ДПМНЕ ќе ги изгласа уставните измени.
Вицепремиерот Груби повика и на суштинска дебата што се добива и што се губи со, како што ги нарече, техничките уставни измени и со членството во ЕУ, а не да се дебатира само за предвремени избори. Мицкоски им порача дека пратениците на партијата не се премислуваат и нема да гласаат.
Денот откако Ескобар одлета не донесе промени во политичките ставови, партиите пред јавноста, останаа во своите ровови.
Миомир Серафиновиќ