Ниту една влада нема да ги тргне рацете од правосудството, лекот е во судии со интегритет. Ова е заедничка оценка на граѓанските организации кои го следат овој сектор. Потсетувајќи на неодамнешната анкета во која над 40 отсто од судиите признале дека имале влијание од колеги, а речиси ист процент биле под влијание на функционери или Судскиот совет, забележуваат дека, со текот на годините, системот на влијание се усовршил.
Системот, велат, од старт е поставен на лоша основа и џабе се добри закони ако нема професионални судии кои треба да ги спроведуваат. Судиите се плашат јавно да пријават притисок, а се навредуваат кога се критикувани.
Катастрофата во судството што ја следи државата од осамостојувањето, според познавачите, сега доживува кулминација. Решенија, велат, сепак постојат.
Поразително, според нив, е тоа што сега реагираат само медиумите и граѓанските организации. Одговорот на прашањето, како до независно судство не е лесен, велат, но со добра анализа, планирање и јавни дебати треба да се охрабрат судиите со интегритет да реагираат, а да се најде начин, подложните на влијанија да се изолираат од судството иако за триесетгодишни проблеми треба барем исто толку време за опоравување.
Далиборка Демјанска Цветановска