Од членките на НАТО утре се очекува договор за продолжување на мандатот на генералниот секретар, Јенс Столтенберг (64) за уште една година, потврдија четворица дипломати за „Ројтерс“.
Столтенберг ја предводеше Алијансата низ неколку кризи по преземањето на должноста во 2014 година. Тој ги обедини членките на Северноатлантскиот сојуз во поддршката за Украина додека, истовремено, се обидува да спречи ескалација на војната во директен судир меѓу НАТО и Русија.
Столтенберг е поранешен премиер на Норвешка. Неговиот мандат на чело на НАТО требаше да заврши на крајот на септември, но сега е веројатно дека ќе остане на функцијата уште 12 месеци.
Тој во февруари изјави оти не бара продолжување на договорот. Меѓутоа членките на Алијансата побараа од него да го прифати тоа, откако не успеаја да обезбедат консензус за наследник.
Меѓу кандидатите се споменуваа британскиот министер за одбрана, Бен Валас, кој јавно кажа дека ја сака работата на Столтенберг и данската премиерка, Мете Фредериксен која, пак, отворено се изјасни дека не е кандидат за таа позиција.