Протестот на српската опозиција наречен „Србија против насилството“ поради двете масовни убиства во земјата во кои загинаа 17 лица, од кои 8 беа деца, започна во Белград. Протестот почна пред Народното собрание, каде беа прочитани барањата на опозицијата, а потоа продолжи со протестен марш до владата.
Уште пред протестот организаторите најавија дека нема да се одржуваат говори, туку само ќе бидат прочитани барањата на опозицијата, која за нивното исполнување и даде рок на владата до 12 мај.
Организатори на протестот се Народната партија, Зелено левиот фронт, Да не го давиме Белград, партијата Заедно, Партијата за слобода и правда, Движењето на слободни граѓани, Синдикатот Слога и Движењето за промени.
Покрај во Белград, протести се одржуваат и во други градови ширум Србија.