И во текот на изминатата ноќ борбите во главниот град на Судан, Картум се одвиваа со несмалено темпо и покрај тоа што двете страни најавија дека ќе се придржуваат до новиот 24-часовен прекин на огнот.
Претходниот обид за примирје еден ден претходно не успеа. Новиот обид за прекин на огнот дојде по тревогата дека милиони Суданци се на работ на катастрофа од изминатите пет дена војна меѓу двајцата најмоќни генерали во земјата.
Најжестоки судири има во центарот на градот. На очајните жители на главниот град им снемува храна и други резерви додека се засолнуваа во своите домови од вооружените борби, бомбардирањето и воздушните напади на улиците.
Болниците се оштетени или преплавени со ранети, персоналот е исцрпен а веќе снемува и медицински материјали.
Сè повеќе, вооружените борци се свртуваат кон ограбување продавници и ограбување на секој што ќе се осмели да излезе надвор.
Во неколкудневниот конфликт убиени се речиси 300 луѓе, соопшти здравствената агенција на ОН, но билансот е веројатно поголем бидејќи многу тела лежат несобрани на улиците.