Тешка хаварија утрово се случи на доводниот цевковод на ХЕЦ Врбен во општината Маврово – Ростуше. Огромни количини вода се излеваат надвор од доводот.
Ваквата информација ја потврдија и од ЕСМ од каде велат стручни екипи се веке на терен и се преземаат сите мерки за санирање на штетите на каналот.
– На доводот Горна Радика,поточно Речки канал,како последица на интензивните врнежи во последните неколку дена, се случи појава на лизгање на теренот и оштетување на дел од каналот,при што дел од водата се излева надвор од доводот. Наши стручни лица се на терен и се преземаат сите мерки околу санирање на оштетениот дел од каналот, кој во преостанатиот дел е во функција и непречено ги носи водите до хидроелектраната Врбен, соопштуваат од ЕСМ.
Хидроелектричната централа Врбен е сместена во близина на селото Врбен и е дел од ХС Маврово, заедно со ХЕЦ Вруток и ХЕЦ Равен.
ХЕЦ Врбен е најоддалечена од трите хидроелектрани на системот и истата претставува проточна хидроелектрана.
Таа e со вкупна инсталирана моќност од 12,8 мегавати. Инсталираниот проток на хидроелектричните постројки изнесува 4,6 м3/сек., додека бруто-висинскиот пад на нивото на водата изнесува 193 м.