Талат Џафери ќе остане на „Илинденска“ до формирањето на новата Влада. За изминатиот период, вели дека „со чист образ и мирна совест може да потврди оти се што ветил кога стапил на должност – се исполнил“. Дали наскоро ќе стане опозиционер или нов државен функционер – зависи од разговорите меѓу партиите.
-Јас сум фокусиран на обврските на составот на Владата што ја водам. Впрочем, мандатот на оваа Влада е до изборот на нова Влада. Работата на конфигурацијата на идната Влада е работа на преговори на политичките субјекти што добиле мандати во Собранието по изборите одржани на 8-ми мај, рече техничкиот премиер Талат Џафери.
Џафери ги отфрла наводите дека ДУИ и Европскиот фронт ги бојкотирале претседателските избори. Се согласува дека некој не гласал, но тој самиот гласал, што е личен избор на секој граѓанин.
-Поединечните, индивидуални ставови не може да се претставуваат или да се заклучат како општи генерални ставови на субјектот или на Фронтот воопшто. Во моето родно место, кандидатката, сега веќе избрана за претседател со мнозинство – имала 100 гласа, против-кандидатот, екс претседателот – 127 гласа, тоа е волја на граѓанинот, вели Џафери.
Техничката Влада беше избрана 100 дена пред гласањето на 8-ми мај. Џафери очекува новата Влада да ја следи европската идеја и да го реализира тоа што го ветува и тоа што е во интерес на граѓаните.
Соња Николовска