Апелациониот суд денеска ја одби жалбата на Александар Ѓорчевски, таткото на убиената Вања за укинување на мерката притвор. Ѓорчевски е осомничен дека помагал при грабнувањето на неговата ќерка. Тој од декември е во притвор во Шутка.
„Апелациониот суд Скопје, жалбата на осомничениот А.Ѓ., од Скопје, изјавена преку неговиот бранител, ја одби како неоснована и го потврди Решението на Основниот кривичен суд со кое мерката притвор се продолжува за уште 30 дена“, соопшти судот.
Неговиот адвокат Владимир Туфегџиќ претходно за Телма изјави дека Ѓорчевски пред судот се изјаснил дека не познава никој од осомничените и дека нема доволно докази за кривичното дело за кое се товари.
Љупчо Палевски Палчо кој е во екстрадициски притвор во Турција е осомничен дека ја убил 14-годишната Вања и 74-годишниот велешанец Панче Жежовски. Се очекува набрзо Палевски да биде екстрадиран во земјава откако завршија судските процедури во Беликесир каде беше уапсен.
Палевски, според исказите на останатите осомничени, им кажал дека информациите за тоа кога Вања ќе го напушти нејзиниот дом и дека ќе биде сама му ги дал Ѓорчевски.