Со викотници и караници пропадна уште еден обид за комплетирање на Државната изборна комисија (ДИК). Тензиите почнаа откако претседателката на Комисијата за избори и именувања соопшти дека кандидатот на БЕСА, Абдуш Демири, не ги исполнува условите за член на ДИК, затоа што во биографијата му стои дека е генерален секретар на БЕСА, а според изборниот законик член на ДИК не може да членува во партиски орган.
На ова жестоко реагираше пратеникот од БЕСА, Фадил Зендели кој покажа нотарска изјава на Демири, доставена во Собранието дека повеќе не е генерален секретар на партијата. Зендели обвинува дека се подготвува изборен фалсификат, а реагираа и од ВМРО ДПМНЕ.
Преседателката се бранеше со доставената биографија.
Местото во ДИК над девет месеци стои празно, откако Кренар Лога стана министер, а Алијанса за Албанците упорно бараат на негово место повторно да седне нивни кадар. На ова се противи албанската опозиција која смета дека местото им припаѓа ним. За избор на член на ДИК е потребно двотретинско мнозинство, кое според сегашниот распоред на силите во Собранието најверојатно нема да го добие ниту еден кандидат, доколку партиите не се договорат.
Далиборка Демјанска Цветановска