Министерот за образование не одговори колкав е збирот на аглите во триаголник. А, во врска со грешката во учебникот по математика за шесто одделение каде тој збир е 190, наместо 180, како што предупреди професорката од „ Корчагин“ , Фросина Митрушева на Фејсбук, Шаќири вели дека побарал од авторите на учебникот , универзитетските професори Крутан Расими, Валентина Гоговска и Снежана Ристовска, да одговорат зошто е направена оваа, како што кажа министерот , техничка грешка. По добивањето на одговорот јавноста ќе биде информирана.
- Јас побарав официјално забелешки зошто се работи за универзитетски професори тие кои се вклучени, како тие ќе ги достават, зошто е направена таа техничка грешка или решение на тие проблематики. Веднаш ќе доставиме и до јавноста , исто така и до наставниците или просветните работници, вели министерот за образование, Јетон Шаќири.
Шаќири не кажа дали некого ќе повика на одговорност, но рече дека грешки во учебниците имало и во минатото. Ги повика авторите и рецензентите да бидат повнимателни кога пишуваат или оценуваат некој учебник. За случајов и денеска од Бирото за развој на образованието и од Националната комисија за учебници се недостапни .
И додека во дел од учебниците, напишани според новата концепција, јавноста втора година открива и е гневна на грешките, учениците во шесто одделение ќе го завршат полугодието без печатен учебник по Историја и општество зашто допрва рецензенти ќе ги оценуваат пристигнатите ракописи. Основците и средношколците повеќе од 6 години немаат ни учебници за странските јазици. Проблемот е во законската регулатива за пријавување на странските издавачи на тендерите. Затоа министерот побарал став од ДЗР околу толкувањето во Законот за учебници и во други закони. Доколку извештајот од ревизорите покаже дека се потребни законски измени, министерот очекува пратениците да ги усвојат во интерес на учениците , во нajкус рок.
Сотир Трајков