Кривична пријава ќе биде поднесена против 36 годишниот жител на Вевчани Ранко Србакоски кој на социјалните мрежи пишуваше дека „децата со посебни потреби се товар на државата и извор на органи за здрави деца“, соопштија денеска од ПВР Струга.
Денеска (27.08.2023) во ОВР Струга е извршен службен разговор со Р.С. од Вевчани по поднесена пријава од Детска амбасада „Меѓаши“ и З.М. од Штип дека преку социјалната мрежа Фејсбук упатил коментари со кои сторил кривично дело по чл.394 од Кривичниот законик. Во службениот разговор Р.С. го признал делото, обезбедени се потребните докази и по целосно документирање на случајот, ќе биде поднесена кривична пријава до ОЈО Струга за ширење на расистички и ксенофобичен материјал преку компјутерски систем, соопштија од таму.
Претходно и Првата детска амбасада Меѓаши поднесе кривична пријава против Србакоски, адресирана до МВР и Одделот за компјутерски криминал по основ ширење на говор на омраза и насилство на социјалните мрежи, за што е предвидена и казна затвор од една до пет години.
За случајот пошироката јавност дозна по преписката на социјалните мрежи и низата навреди од страна на Србакоски кон Зоран Мијалков, кој е татко на две деца со аутизам.