Едно лице е спасено и пренесено во ГОБ „8 септември“, а по други три се трага во водите на реката Лепенец, откако попладнево во неа заврши патничко возило од марката БМВ со косовски регистарски таблички.
Во инцидентот учествувал и патнички автомобил со скопски регистарски таблички
Од Министерството за внатрешни работи (МВР) велат дека во тек е спасувачка операција и повеќе детали се очекуваат во текот на вечерта.
Од обвинителството соопштија дека несреќата се случила кога скопскиот автомобил претекнувал колона возила:
-Дежурен јавен обвинител од Основното јавно обвинителство Скопје е на лице место на тешка сообраќајна несреќа на патот Скопје – Приштина и презема дејствија за утврдување на причините. Според првичните информации, до несреќата дошло кога автомобил Фолксваген туран со македонски регистарски ознаки претекнувал колона автомобили. Во моментот кога стигнал паралелно до автомобил со БМВ косовски регистарски таблички кој се движел во истата колона, двете возила се доближиле и странично се удриле, по што косовскиот автомобил со четворица патници излетал од патот и се превртел во реката Лепенец. Причините за сударот се уште се утврдуваат, а на лице место е присутен и сообраќаен вештак. Еден од патниците во косовското возило е извлечен од водите и веднаш е префрлен во болница, додека по останатите потрагата во исклучително тешки услови е во тек, соопштија од обвинителството.