Делумно ембарго и забранет влез на стоки од Србија кон Косово – со вакви мерки дополнително се заладуваат односите и се засилува кризата помеѓу соседите. Погодени трговци, бизнис-сектор, а и целата економија. Двајца протагонисти, но целиот регион жртва среде кризата. Експертите предупредуваат – секој конфликт ќе донесе последици, а најмногу на економски план.
Државите да не станат гнездо на политичките амбиции и граѓаните да не останат без економска перспектива. Ова е пораката на стопанствениците. Ако кризата потрае, Македонија може да ја искористи ситуацијата – но, колку е тоа етички?! Ова прашање се отвора со оглед на тоа што извозот од Македонија во Косово е сериозно развиен и изнесува над 400 милиони евра.
Претходно, Владата на Косово објави дека по апсењето на тројца припадници на косовската полиција, е донесена одлуката да се забрани влез на српска стока и камиони со српски таблички. Инаку, Македонија најмногу извезува храна односно прехранбени производи во Косово, велат податоците со кои располагаат коморите. Но, на мапата се и други производи од секторот на металургијата.
Петар Догов