Можни се разни форми на влијанија, софистицирани, директни, индиректни, преку изземања, преку распоредите, итн. и сите тие се споменати во самата анкета на ОБСЕи идентификувани од колегите судии, изјави Бетим Јахја, судија во Основниот суд Тетово, во вечерашната дебата во „Топ тема“ на Телма ТВ.
„Колегите судии ги идентификувале изземањата и распоредите како корупциски ризици. Начините се знаат. Начинот на утврдување на годишниот распоред е утврден со закон. И тоа е овластување на претседателот на судот. Исто така и со судскиот деловник. Распоредот се составува по претходно добиено мислење од судиите во одредени области. Покрај судиите, се определуваат и заменикот на претседателот, односно на судот, па и носителите на некои позиции во самите судови, како на пример раководителите на посебни одделенија. И сето тоа е законски регулирано. Меѓутоа, корупциските ризици во тоа се гледаат од таквата диспозиција, апсолутна би рекол на претседателите во таквото составување, изготвување на распоредите или изземањата“, вели Јахја.
Проблемот со вештачењет, според Јахја, е утврден како факт и од колегите судии, како кривичари, така и граѓански судии..
„Сериозни проблеми во пракса имаме со вештачењата. Значи, се изготуваат т.н. нарачани вештачења и тоа ни создава проблем. Секоја странка, ако јавниот обвинител доставува, на пример, едно сообраќајно вештачење, на пример за сообраќаен деликт, одбраната доколку не е задоволна, донесува или предлага да се изнесе како доказ некое спротивно вештачење на вештачењето на јавниот обвинител. И во тој случај, судот може да биде приморан, или по предлог на странките или по службена должност, да определи супервештачење“, истакна Јахја.