Над 1.400 професори денеска на тајно гласање кое ќе се спроведува во периодот од 12 до 14 часот од шесте кандидати ќе го изберат новиот ректор на УКИМ со мандат од три години.
По завршување на гласањето, изборните единици ќе ги пратат резултатите до Универзитетската изборна комисија.
Според роковникот за организирање на изборите, оваа комисија до крајот на денот треба да ги објави резултатите.
Потоа ќе следува период за поднесување приговори во рок од три работни дена. Откако ќе бидат разгледани евентуални приговори, Универзитетската изборна комисија на 6 јуни ќе ги објави конечните резултати.
Доколку на некои единици во состав на УКИМ е потребно прегласување, повторното гласање ќе се организира на 9 јуни од 12 до 14 часот, а резултатите ќе бидат објавени до крајот на истиот ден.
По законскиот рок од три дена за приговори, конечните резултати за избор на ректор ќе бидат објавени на 15 јуни.
Кандидатот што ќе биде избран, од септември ќе го наследи актуелниот ректор, проф. д-р Никола Јанкуловски од Медицинскиот факултет, кој функцијата ректор на Скопскиот универзитет ја извршуваше два мандата.