Дали сме задоволни со процентот на реализација, јас велам секогаш можеме повеќе, дали сме биле амбициозни – можеби да, можеби не, имајќи во предвид со какви предизвици се соочивме во 2020 година, изјави магистерка Есма Адиловиќ Фазлиќ, советничка за реформи во јавната администрација во Министерството за информатичко општество и администрација (МИОА), во вечерашната дебата во „Топ тема“ на ТВ Телма.
„Стратегијата беше донесена во 2018 година, но 2020 година беше клучна година, кога ја имавме пандемијата, но и распуштање на собрание, техничка влада, имавме вонредна состојба во државата, па затоа забави и темпото на реализација на процесите. Но, целата администрација се насочи кон справување со мерките за надминување на пандемијата. Така, нашето Министерство во тој период се ангажираше на издавање на дозволи за движење во полицискиот час. Затоа, 2020 година, која беше клучна за реформите, не се постигна тоа што се очекуваше, но она што е важно е дека реформата не запре, реформата продолжи во континуитет за денеска да е 63 проценти на реализација“, изјави Адиловиќ Фазлиќ.
Таа нагласи дека стратегијата за реформи на јавната администрација е прва што е направена согласно Сигма принципите.
„За да имате добра и успешна реформа, треба да имате три основни предуслови. Првиот е да имате политичка поддршка, што беше изразена во самата Стратегија. Вториот се однесува на човечките капацитети, што секако ги немате одеднаш, но тие континуирано се надградуваат. И третиот момент се фианнсиските средства за реализација. Ова Стратегија е национален документ кој што ја даде првата визија каде реба да оди администрацијата. Гледам дека визијата е добро поставена. Нашите извештаи покажуваат дека процесот во еден период забави, но не запре“, додаде Адиловиќ Фазлиќ.