Овластениот судски вештак по електротехника, Ирфан Шаќири, на денешното рочиштето за случајот „Модуларна болница Тетово“, сведочеше дека според неговиот наод, целата постапка на изведување на електричната инсталација во модуларниот објект била реализирана со недостаток на голем број документи потребни за ваков тип на градба. Тој рече дека изведбата не била согласно прописите и правилниците.
Самиот чин на приклучување на објектот во мрежата на операторот е изведена од двајца вработени во Клиничката болница без изготвување документ, неопходен за ваков тип и без надзор од овластени електроинженери. Објектот проектиран од „Брако“ е монтиран, според нив, како што се барало од Министерство за здравство, според нивната изјава, нивна должност била само да го изготват и монтираат на дадената локација. Од нивна страна во однос на електричната инсталација нема елаборат, бидејќи според нив, никој не им барал. Ми беше приложена шема за електрични уреди во објектот, меѓутоа таа била за нивни интерни потреби, не беше валиден документ, овластен од комората, посочи Ирфан Шаќири, овластен судски вештак по електротехника.
Пред судот сведочеше и тетовчанка која за време на пожарот била во модуларната болница заедно со нејзиниот сопруг, кој бил хоспитализиран таму и кажа дека во целата паника тие се спасувале преку прозорецот.
Денес беа презентирани и писмените докази на одбраната, односно договори со компанија задолжена за набавка и одржување на ПП апарати, правилници и одлуки за заштита од пожари, планови за функционирање и сл., потоа извадоци од весници и прилози, кои покажуваат дека обвинетиот доктор не бил раководител, како и барање до Министерство за одбрана за испраќање помош во справување со големиот број пациенти.
Инаку пред почетокот на судењето повторно се одржа граѓански протест за поддршка на докторот Бобан Вучевски.
Во овој случај, поранешните директори Флорин Бесими и Артан Етеми се обвинети за кривично дело „тешки дела против општата сигурност“, докторот Бобан Вучевски за „непостапување според здравствени прописи за време на епидемија“, за кое се товари и правното лице Клиничка болница Тетово. Следното рочиште е закажано за 21 март.
Данијела Билбилоска