ВМРО – ДПМНЕ денеска обвини за нова афера на Власта, а според нивните информации, функционери на СДСМ и ДУИ на различни позиции поседувале таен имот.
– На списокот кој го поседуваме има куќи, станови, викендици, деловни простории кои се скриени од очите на јавноста. На овој список се државни функционери, претседатели на комисии, директори, раководни луѓе на институции. Поголемиот дел од нив директно поставени од владата и функционери во партиите на власт, информира пратеникот на ВМРО – ДПМНЕ Бране Петрушевски.
Тој додава дека за 5 години власт на СДСМ 123 именувани функционери на државни позиции успеале да сокријат имот вреден 30 милиони евра, како и дека опозициската партија ги поседува сите детали.
Петрушевски заклучи дека новата афера „Тајни имоти“, е уште еден показател како власта функционира надвор од законите, заштитувајќи ги прекршителите на истите, кои во овој случај се избрани и именувани функционери, а чија обврска е да служат на граѓаните на Македонија.