Согласно податоците од 30 центри за социјална работа во Македонија, лани е забележан благ пад од 4, 3% на бројот на жртви на семејно насилство во однос на преклани. Ова го кажа министерката за труд и социјална политика на денешниот брифинг.
Во 2022 година имаме евидентирано нови 1543 жртви од кои жени се 1074, мажи се 252 лица и имаме 227 деца-жртви на семејно насилство. Споредено со 2021 година кога имавме 1608 жртви, имаме намалување на новоевидентираните жртви на семејно насилство за 4, 3%, соопшти министерката тренчевска.
Со најголем број – 530 жртви на семејно насилство, Скопскиот плански регион е пред останатите во земјава. Пелагонискиот е на второ место со 241 новоевидентирана жртва, а најдолу е Североисточниот регион со 60 жртви. Според податоците , бројот на сторители на семејно насилство лани изнесувал 1.382. Од нив 1.268 се мажи, а 114 се жени, а пред другите видови, доминира психолошкото насилство, со 1.051 жртва.
После психолошкото насилство доаѓа физичкото насилство со 846 жртви. Имаме пријави за сексуално насилство од страна на 6 жртви и 25 жртви на економското насилство, изјави тренчевска.
Центрите за социјална работа до граѓанските судови поднеле 2.095 барања за привремени мерки за заштита на жртвите, а од страна на судовите се изречени 1.823 привремени мерки. Минатата година 83 жртви на семејно насилство биле сместени во шелтер центрите низ Македонија.
Сотир Трајков