Претседателски и парламентарни избори имаше и во 2014 година. Целта на Агенцијата за аудио и аудиовизуелни услуги (АВМУ) не е да ги казнува медиумите, туку да изработиме заеднички правила што ќе бидат јасни и медиумите ќе можат да ги следат, рече Зоран Трајчевски, директор на АВМУ, во интервју во вечерашната „Топ тема“ на ТВ Телма.
Ако стриктно се почитува Изборниот законик, вели Трајчевски, кога постои молк, медиумите не смеат да известуваат не само за кандидатите за претседател, туку за било кој друг носител на функција политичка или од органите на власта.
„Така што, кога има молк за претседателските избори, медиумите не смеат воопшто да известуваат за активности во кои се вклучени носители на функции во политичките партии и во органите на власта. Се договоривме во текот на наредната недела да имаме состанок во претставници на Државната Изборна комисија (ДИК) и со Државната комисија за спречување на корупција за расчистување на овие дилеми, со цел медиумите јасно да ги знаат правилата за да можат да ја извршат својата функција што ја имаат и која е многу значајна за време на изборите“, изјави Трајчевски.
Пред официјалниот почеток на изборната кампања, Трајчевски најави дека АВМУ ќе изработи акт со кој што ќе ги објасни правилата на медиумите за нивното известување за време на изборниот процес, како во делот на платеното политичко рекламирање, така и во делот за известувањето во дневно-политичките и информативните емисии.
„Медиумите, секако, нема да бидат оставени сами на себе, односно тие да бидат еден вид жртва, ако може да се каже, туку ќе имаат јасни правила“, истакна првиот човек на АВМУ.