По американскиот претседател и германскиот канцелар, денеска во Израел допатува и британскиот премиер Руши Сунак. Пораката која тој ја носи е идентична со таа на двајцата претходни лидери. Важно е да се покаже солидарност со Израел, но и да се изврши притисок врз него за да започне доставата на хуманитарна помош во Газа и копнената инвазија на Израелците во појасот да биде со јасни цели и со умерена сила.
„Ова е важен момент. За мене е важно што можам да изразам солидарност со израелскиот народ по ужасниот терористички напад. Пред нас имаме продуктивни состаноци денеска.“, изјави Сунак.
Откако вчера Израел објави дека ќе дозволи влез на хуманитарна помош во Газа, денеска дополнија дека транспортот се очекува да започне утре, откако ќе бидат поправени патиштата. Тие ги повикаа Палестинците да се упатат кон областа Ал Маваси, во близина на Рафа. Но, нејасно е колкумина ќе успеат да стигнат до таму во ситуација кога Израел сѐ уште извршува воздушни напади во Газа.
Додека траеше посетата на Бајден ширум регионот избија пропалестински протести. Демонстрантите во Бејрут и Аман се обидоа да се пробијат во американската амбасада, додека безбедносните сили употребија солзавец и шок бомби за нивно растерување. Никој во околните арапски земји не верува дека експлозијата во болницата во Газа, била предизвикана од залутана ракета на Палестинскиот Исламски џихад.
„Палестинската кауза е праведна, и сите мора да ја прифатат. Мораме да застанеме против етничкото чистење и расизмот.“
Додека траат дипломатските посети, израелската армија го искористи периодот да им дозволи отсуство на дел од резервистите. Тоа, според западните експерти значи дека по завршувањето на овие разговори, на кои Израелците ќе објаснат што планираат во Газа, офанзивата се очекува да започне.
Игор Трајков