Европската Унија и државите од регионот да бидат подготвени за проширување во 2030 година, но тоа не значи дека 2030-та е определена како целна година за проширување, напомена Малинка Ристевска Јорданова, експертка за ЕУ, во вечерашната Топ тема на ТВ Телма, коментирајќи го дел од завршната декларација од еднодневниот процес „Брдо-Бриони“ во Скопје.
„Тоа значи едните да направат реформи, другите да решат што треба да решат од спорови и да стигнат со реформите, па потоа ќе видиме како ќе одиме понатаму. Прво тоа да го расчистмие, бидејќи многу лесно се игра со зборови. Во моментот тоа е. Ние, регионот, да се задоволиме со овој вординг, а тие да кажат ние ветивме, што ветивме, да бидеме подготвени“, вели Ристевска Јорданова.
Во поглед на регионалните иницијативи, таа смета дека Регионалниот совет требаше да биде тој што ќе ги рационализира многуте регионални иницијативи или што постоеја дотогаш.
„Тој успеа во тоа до извесна мера, но не целосно. Знаете секој има некаде интереси, на крајот сите преживеаја, а не се успеа тие да се рационализираат и насочат. Европската Унија има важна улога во Регионалниот совет, како финансиер и со членство. Така што не може да се рече дека нема влијание од Европската Унија. Меѓутоа, она што беше проблем е што регионот не го препозна Регионалниот совет како можност, политичките лидери воопшто не се идентификуваа со Регионалниот совет како сублимација на сите дотогашни иницијативи“, смета Ристевска Јорданова.
Според неа, има и суштествено прашање, а тоа е во која мера процесот можеше да го замени проширувањето.
„Тука може да дебатираме до бескрај, но тој не може да го замени проширувањето. Проблем е, исто така, во која мера беше дизајниран за да купи време додека се донесе политичка одлука за проширувањето. Тоа што фалеше со годините беше политичкиот импулс. И тука Германија влезе со Берлинскиот процес во 2013, 2014, година. Годините претходно беа време на заморот од проширувањето. Германија се обиде тоа да го предаде на другите, на Италија, на Франција, па регионот Софија – Скопје и на крајот си го врати назад за да обезбеди политичко водство“, нагласи Ристевска Јорданова.