Украинската воздушна одбрана ноќеска собори 35 беспилотни летала од иранско производство, во големиот руски воздушен напад врз престолнината на Украина.
Пет лица во главниот град се повредени од остатоци од дрон кои паѓале низ повеќе делови на Киев, соопшти киевската воена управа. Остатоци од дрон погодија двокате апартман во висококатница во западната област на Киев.
Делови од погодениот дрон паднале врз автомобил во близина и предизвикале пожар на возилото. Градоначалникот Кличко го посети местото на нападот.
-Камикази-дроновите летаа во правец на нашиот роден град, но благодарение на нашите противвоздушни сили сите беа урнати, рече Виталиј Кличко, градоначалник на Киев.
Жителите на зградата преплашени се од нападот кој е најголем воздушен напад од почетокот на војната.
-Звукот беше ужасен, никогаш не сум слушнала такво нешто. После 5 минути имаше силно светло и разбрав што се случува. Ужасно ми е, домот ми е на 50 метри оттука, на исто ниво на прозорци со моиве се случил падот на остатоците, изјави Наталија Хаврилук, жител на Киев.
Поради масовниот напад, сирените за узбуна во Киев биле вклучени повеќе од три часа.