Зголемувањето на цените ги испразни рафтовите со овошје и зеленчук во маркетите. Доматите, пиперките, краставиците и бананите од денеска може да се најдат само на пазарите. Таму пак овошје и зеленчук има, цени на картонче на тезгата-нема. Граѓаните револтирани велат цените се до плафон.
Сликата на пазарите ширум земјава е иста. Може да се најде овошје и зеленчук, но со непозната сума. Пазарџиите за Телма велат дека Владата освен со граѓаните си поигрува и со нив, а не им се исплаќа да продаваат по замрзнувањето на цените.И во Тетово и граѓаните и пазарџиите револтирани.
Во ек на празници граѓаните брзаат да купат овошје и зеленчук за да ја наполнат велигденската трпеза, а инспекторите на терен прават проверки дали има производи на рафотвите и колку од трговците се придржуваат до цените.
Владата донесе одлука да ги зголеми замрзнатите цени на доматите за 95 денари, а исто толку ќе чинат и свежите краставици.Кромидот за 70 денари, а гравот ќе чини 95 денари. Бананите 75, а портокалите и лимоните по 60 денари. За 75 денари ќе може да се купат кило мандарини, а нешто над 100 денари ќе чинат пиперките и леќата.
Откако инспекцијата откри фалсификувани фактури за увоз на зеленчук и овошје со намалување на цени за да се намалт давачките кон државата, увозниците мораа да почнат да работат со легални увозни цени. Поради тоа увозната цена во пресметките на владата скокна за 30 % и ги зголеми замрзнатите цени. Контролата на 20-те најголеми увозници е во тек, изјави Ковачевски кој тврди дека државата ќе носи мерки за непречено снабдување по соодветни цени без да го нарушат пазарот. А на зелените пазари токму цената ја нема.
Симона Петровска