Политичката волја и искреност на една влада, особено на политичката партија која го добила мнозинството, се отсликува и во тоа колку е конзистентна во спроведување на политиките во одредени ресори и во поглед на тоа кои ресори одлучила да ги земе владеачката политичка партија, смета Ана Павловска Данева, професорка на правниот факултет, „Јустинијан Први“, во вечерашната дебата во „Топ тема“ на ТВ Телма.
„За жал, последните министри не само што нема да можат да спроведат некакви реформи во рок од една година, бидејќи не постои државата во светот во која во една година се спровела било каква реформа, туку и претходните министри, конкретно за Правда и за Информатичко општество и адмнинистрација, ресори во кои се очекуваа клучните реформи на новата владеачка елита, не можеа да бидат спроведени. Впрочем, власта во 2017 година беше сменета врз основа на паролата „Нема правда, нема мир“, што значи дека најкрупните реформи ги очекувавме токму тука“, вели професорката Павловска Данева.
Статистиката, додаде таа, покажува дека од тој момент, до денес се сменети пет министри.
„Тоа значи за пет и пол години, шест или секој од министрите биле по точно една година. Значи не е дека само последниот ќе нема време, туку и претходните немале време. Дури и да биле способни и да сакале, не можеле да спроведат некакви реформи. Најдолг мандат имаше Бојан Маричиќ, нецели две години. Пораката што се праќа на електоратот, на граѓаните, е дека навистина не постои цврста политичка волја да се направи реформа. Оти не можете да ги менувате министрите на година дена и истовремено да ги убедувате гласачите дека сакате да спроведете реформа. Тоа е невозможно“, рече Павловска Данева.
Таа особено го потенцира ресорот Правда за кој рече дека СДСМ, во првиот момент на освојување на власта, го даде на коалиционен партнер.
„Тоа беше Билал Салии, кој донесе стратегија за реформа што беше оценета како извонредна од Европската комисија, меѓутоа тој немаше можност да ја спроведува. Беше сменет и на негово место дојде Рената Дескоска, па Бојан Маричиќ, па професорот Никола Тупанчески, за на крај, по една година, пак да го даде на коалиционен партнер. Пораката што се праќа е дека се бега од одговорност“, смета професорката од правниот факултет.