Со 68 поени, еден повеќе од лани, Македонија и натаму останува во групата делумно слободни земји. Во последниот извештај на Фридом хаус за состојбата со демократијата во светот, политичките прва се оценети со 29, од можни 40, а граѓанските слободи со 39 поени од можни 60.
Ова ја сместува Македонија во група со повеќе земји од регионот. Албанија и Црна Гора имаат 67 поени, додека Србија и Косово имаат по 60 поени. Далеку од максималните сто поени, колку што имаат целосно слободни земји како Норвешка, Шведска и Финска.
Целосниот извештај за Македонија не е објавен, но генералната оценка на Фридом хаус е дека во 2022 година борбата за демократија се приближи до пресвртница.
Глобалната слобода се намалува 17-та година по ред, а воената агресија на Москва доведе до разорни злосторства со човековите права во Украина.
Повредата на слободата на изразување долго време е клучен двигател на глобалниот демократски пад. Во текот на последните 17 години, бројот на земји и територии кои добиваат оценка од 0 од 4 на индикаторот за слобода на медиумите в се искачи од 14 на 33, бидејќи новинарите се соочуваат со постојани напади од автократите и нивните поддржувачи, додека добиваат несоодветна заштита од заплашување и насилство дури и во некои демократии.
Фридом хаус пишува дека изминатата година донесе повеќе од иста состојба: слободата на медиумите беше под притисок во најмалку 157 земји и територии.
Сепак, како што пишува во извештајот, борбата за слобода опстојува со децении. Кога Фридом Хаус го издаде првото издание на своето глобално истражување во 1973 година, 44 од 148 земји беа оценети како слободни. Денес, 84 од 195 земји се слободни.
Иако демократизацијата забави и наиде на неуспеси, луѓето ширум светот, продолжуваат да ги бранат своите права од авторитарни напади.
Според звештајот, најнеслободна земја во светот со само еден поен е Сирија, исто како и Јужен Судан. На дното е и Северна Кореја со три поени.
Марија Дивитарова