Поранешниот пратеник на СДСМ, Шилегов, во емисијата „Вин-Вин“ изјави дека е легитимно секој што смета дека има политичко значење во општеството да ја истакне својата кандидатура на претстојните избори. Според него, допрва ќе се види дали ќе бидат искористени законските прописи и услови што им се на располагање.
„Како и да е, мислам дека во суштина ние ќе се сведеме на не повеќе од четири, евентуално пет, а некој којшто ќе успее да собере потписи, некој којшто, како што сами кажувате, двете најголеми политички партии во Македонија, Социјалдемократскиот сојуз на Македонија и ВМРО-ДПМНЕ од една страна, меѓутоа мислам дека е веќе извесно дека фронтот меѓу ДУИ и Обединетата албанска опозиција е извесен“, изјави Шилегов.
Неговиот соговорник, поранешниот пратеник на ВМРО-ДПМНЕ Илија Димовски смета дека кандидатите за изборите ќе имаат еднакви шанси за своја презентација.
„Ние ќе имаме најмалку 20 дена во коишто сите претенденти и за претседател, но и оние што ги кандидираат како политички структури ќе имаат тотално еднакви шанси и еднакви можности за своја презентација. Дел од тој период го преклопува и периодот на парламентарната кампања подоцна така што мислам дека прилично ќе бидат изедначени можностите на политичките партии да се презентираат себеси“, изјави Димовски.