Израел ги интензивира, но и проширува копнените операции во Појасот Газа, порача портпаролот на израелските сили Даниел Хагари. Во истовреме медицинскиот персонал и Обединетите нации изразуваат голема загриженост по вчерашните воздушни напади и проектилите кои паднаа во близина на болниците кои се засолништа на илјадници Палестинци.
Мета на израелските воздушни сили утрово бил и бегалскиот камп Јенин, при што во нападот, според Хагари, биле ликвидирани неколку вооружени милитанти на Хамас. Во ноќните и претпладневните рации во Јудеа и Самарија, како што нагласи, биле уапсени борци на палестинската милитантна група. Слична судбина, порача тој, ги очекува и припадниците на проирански Хезболах.
Додека израелските воздушни и копнени операции не стивнуваат, состојбата во енклавата се влошува од ден во ден. Хуманитарните работници порачаа дека најголемиот конвој со помош што пристигна во Појасот сè уште не ги исполнува потребите.
Војната меѓу Израел и Хамас влезе во 24-тиот ден, а започна откако милитантите на Хамас на 7 октомври ја пробија засилената израелска граница и извршија напади врз израелските погранични заедници, но и на музички фестивал, пришто киднапираа и над 200 лица.
Израел одговори со воздушни напади врз Појасот Газа и го запре снабдувањето со храна, гориво и други резерви како одмазда за крвавиот упад, ветувајќи дека ќе ја уништи милитантната група.
Министерството за здравство во Газа, под раководство на Хамас, вели дека над 8.000 Палестинци се убиени од почетокот на војната на 7 октомври. Израелските загуби, според официјалните извештаи, се над 1.400 луѓе, главно цивили.
Покрај тоа, 239 заложници беа однесени од Израел во Газа од страна на милитантната група. Досега се ослободени четворица заложници.
Сашко Димовски